शेणखत आणि आजोळ

शेणखत हा जो काही प्रकार आहे तो मला अतिशय आवडतो. झाडांसाठी हे एक उत्तम खत तर आहेच, पण या खताच्या नावातला जो "शेण" हा शब्द आहे तो माझ्या फार जिव्हाळ्याचा आहे.

 

मी जेव्हा जेव्हा झाडांना "शेणखत" घालते, तेव्हा तेव्हा मला असा भास होतो की मी जणू काही शेणातच हात घालत आहे. त्या खताला जो शेणाचा एक मस्त वास असतो किंवा सुगंध असतो, तोच मनाला फार फार भावणारा असतो. कितीही उंची अत्तरं या वासापुढे तोकडी पडतात.

 

या खताला मी जेव्हा हात लावते, तेव्हा मुंबईत बसून मी कुठल्यातरी खेड्याला जोडली जात आहे असा भास मला व्हायला लागतो आणि यात कुठलीही अतिशयोक्ती नाही.

 

माझं आजोळ खेड्यातलं, घरी भरपूर म्हशी, गायी, त्यामुळे शेण, त्याचा सुवास, गोवऱ्या यांचंच आजूबाजूला कायम हवंहवंसं वाटणारं वातावरण..

मी कधीही जेव्हा झाडांना शेणखत घालते तेव्हा त्या शेणाच्या सुवासाने सुरु झालेलं विचारचक्र मला शेवटी माझ्या आजोळी नेऊन सोडतं.

 

मुंबईहून शेणाच्या साथीने सुरु झालेला हा प्रवास काही सेकंदातच आजोळी पोहोचून संपतो..